إنطلقـنـا بحمد الله ورعايته يوم الخميس الماضي تاريخ 1/2/2007 م

إلى منطقة حنيـذ والسبسب وما جاورها ..

كانت الرحلة سريعه جدا عبـارة عن إستكشاف للمنطقه أكثر من المرة الماضية ..

وذلك لمعرفة الدروب والأماكن الجيدة بالإضافة إلى أنها تعتبر من أطراف الصمان إلى أنها قريبه من الدمام ..

فهذا الي يخلينا نتحمس ونروح يوم واحد ونرجع ..

طبعا صلينـا الفجر في مسجد واحد عند بيتنا .. وإنطلقنـا جميعـا بالونيت ..

طبعـا ما يحتاج الطريق 120 ممنوع الزيادة بحكم السلامه

وصلنـا إلى عريعرة .. وأخذنـا لحم حاشي من الملحمه ..

وإنطلقنـا إلى حنيذ تبعد عن عريعره بـ 50 كيلوا تقريبـا

قبل الوصول الى حنيذ دخلنـا للبر .. للإستكشـاف الجديد ..

طبعا المنطقه يعيبها شيء واحد .. الي هو كثرة المزارع في بداية الطريق والشبوك الي تتعب .. وكذلك الصبخه الي طحنا فيها المره الثانية .. والحمد لله على السلامه

وصلنـا للجو الأول ..

نزلنـا الأغراض .. وجلسنـا شوي ..

نتقهوى ..

طبعا وصلنـا تقريبا الساعه 10:30 بحكم التمشي .. ولا لو على طول للبر تقريبا نبي نوصل على الساعه 9 بالكثير .. بس هذه المعلومات للي يبي يروح هنـاك ..

شبينـا الحطيبات .. لزوم البر ..

ونقرشنـا على حنيني .. حميناه على هالحطيبـات ..

ما أمدانا نجلس شوي الا ويجينـا رش .. اللهم بارك ..

بس ما شاء الله ما وقف الرش ..

ظفينا اغراضنا .. وخلينا بعضها مثل الرواق على ما يوقف الرش علشان نرجع ..

لكن ما فيه فايده .. ما وقف الرش ..

ورجعنـا أخذنا رواقنا .. وبتلنا نتمشى ..

شوي يوقف وشوي ينزل ..

يقولون ان ذيك المنطقه فيها فقع .. بس ما ليقينا شيء ..

بس فيه شيء جاي غلط .. شكله جاي معنـا من الحاره من الدمام .. لأنهم كثير عندنا بالحارة ..

طبعا ذا الصقر <<< يسمع بالصقر

جاه المطر .. ودخل للسيـاره يتدفى

طبعا تمشينـا بالمناطق ذيك كلها تقريبـا الي جنب بعض ..

وتم إلتقاط بعض الصور ..

طبعا بعد ما تمشينـا .. وقف المطر نوعا ما ..

نزلنـا العفش من جديد ..

ثواني من النزول .. الا والرش يرجع .. وشوي شوي ويقوى ..

حاولنا نسوي شراع .. يمين يسار .. ما فيه فايده ..

قلنا يا ولد .. مالك الا الرجعه ..

والله ونشوف لنـا مخيم ( بدور جنبنـا )

وننصاهم ..

قلنا نبي نصلي ونمشي ..

إستقبلنا الهندي حقهم .. بس ما شاء الله عليه شقردي .. معودينه السنع ..

واخذنا لنـا جولة إستكشافيه حول المخيم ..

ودخلنـا البرتبل حقهم .. <<< الصندقة للي ما فهم ..

وكشفنـا أبو هنود ..

لازم شيء يدفيه .. ومعرف أكيد ..

ولزوم الدفى أكثر

العزبـة .. بش شغل متعوب عليه ..

صورة من داخل البرتبل ..

قعدنـا في الخيام بعد ما صليـنا

الين خف المطر ..

ومشينـا .. والى الان ما تغدينـا

أخذنـا لنا جولات في الرجعه .. وإلتقطنـا بعض الصور ..

من أفضل ما رئيت وصورت ..

من زاوية أخرى

طبعا قلنـا نرجع لصلاله .. هنـاك عمي .. نطبخ غدانا عنده .. ونعين من الله خير .. بعد حوسة هالمطر ..

والى الان ما تغدينـا .. عليها من الفجر ..

كبدة من التسهيلات بالخط ..

الحمد لله وصلنـا لصلاله في المزرعه .. وصلينا المغرب والعشاء جمعا ..

وطبخنـا غدانا ..

طبعا فيه ( همبو ) ما يعرفه الا الي يشوفه ..

وهذا الملعلم همبوا مع طباخنـا ..

غاصبينه يلبس شماغ .. وهو يعاون الطباخ انحاس ولا يفضخه والقانون قانون

طبعا ادعوله بالهداية .. والله مدري عنه .. تشهد .. ويصلي معنـا .. ويسمي قبل الأكل .. وكلش .. بس بقر ما ياكل يعني .. مدري .. الله يهديه ويثبته ..

وجلسه على الضويه وسواليف يحبها قلبك .. مو مثل بعض الناس كل سوالفهم بالأسهم ..

الين جاء غدى العشى .. طبعا من الحاشي الي شريناه من النعيريه ..

وتغدينا ومشينـا طبعا فينا النووووم .. لأن بعض الناس مشربينا كفي في اخر الليل الساعه 3 بالليل .. ولا جانا النوم .. الى الليل .. طبعا الكفي ذا مهوب بياله ولا كوب .. بسطل مشربينا .. ولا يا ابو ابراهيم ..

الحمد لله كانت رحله موفقه .. تم إكتشاف المنطقه من جديد .. والحمد لله الأرض كلها مربعه .. وفازه بالربيع الي فيها ..

كان معكم من اللجنة الإعلامية للرحله أبو عادل

وداعا .. إلى الرحلة القامة ..