سعد العبدالكريم

بسم الله الرحمن الرحيم

بين أسراب الطيور .. وكثيف السحـاب .. من أعالي المرتفـعات ..وفسيح البحيرات .. وتعدد الشلالات ..
إنطلقنـا إلى أندنوسيـا .. (سحر الطبيعة الاستوائية) ..
جبـال و هضـاب .. سحبٌ وأمطـار .. طبيعةٌ خلابة .. ومناظر براقة .. لا تملك الا أن تقول سبحان الله ..
هكذا رأينـاها .. لم نتصور أن تكون هكذا .. لكن إكتشفنـا مالم نتوقع

ابا كبر يا ماس
معناها : كيف الحال يا رجل

أندلوسيـا <<< كما يسميها أحد الشباب ..
دولة الـ 1000 جزيرة ..

كانت التخطيط في هذا الصيف الذهاب إلى جنوب أفريقيـا .. لكن لم تتيسر من فيزا وغيره .. مع أن الأمور كانت سهله وميسره .. الا أن التأخير منا .. !!
ثم جاءت الفكرة إلى أندنوسيـا .. تم الترتيب للرحلة .. من حيث الحجز والتذاكر وأمـاكن الزيارات .. ومعرفة عامة عن المدينة ..

حجزنـا عن طريق مكتب سعد للسفريات يوم الأحد الموافق 26/8/2007 والعودة بإذن الله 8/9/2007
تكلفة الحجز بـ 2470 ريـال ذهاب وإيـاب ..

تم ترتيب الأغراض والعفش .. ثم إنطلقـنا من مطـار الدمام إلى مطار أبو ظبي ..

ومن ثم إنتظار ساعه تقريبا .. ومن ثم إلى جاكرتـا ..

على الجميع ربط احزمة المقاعد

طبعا الطيـارة كانت رائعه جدا .. من الدمام الى أبو ظبي .. واستبشرنا غير .. ويوم شفنـا الطيـارة الي الى جاكرتـا ..
قلنـا هذي أولها .. الله يستر من تاليها .. بس أحلى نومه في الطياره برعاية بندول نايت …

طبعا الوجبـات الي قدموها لنـا الله بالخير .. ما ودي أتكلم عنها علشان ما أتذكرها ..

الحمد لله وصلنـا الى جاكرتـا .. وفي المطار أول ما نزلنـا .. رحنـا نفيز .. والحمد لله خلصنـا آخر ناس .. خخخخخخ <<< شنسوي أول مرة نروح لها ..

ما كنت في يوم من الأيـام أفكر مجرد التفكير أني أروح للديرة هذي .. بس سبـحان الله .. شيء بصراحه ما توقعناه أنه تكون البلد بالشكل هذا ..

عبينا الورقة حقت الجمـارك .. وختموها وعطونا الكعب حق الورقة .. هذي الورقة حقت الجوازات .. لازم تدبسها في الجواز .. لأنها مهمه في الرجعة .. ولا تعرض لمسآئله .. 

بعد ما خلصـنا الفيزا .. جونـا حقين هديه هديه .. بس انهم شوي والحمد لله .. وصرفناهم وكملنـا وعلى الجوازات .. ويستنى نعطيه هديه .. ولا عطيناه .. صحيح عطلنا شوي .. بس مو مره ..
أخذنـا العفش .. وحجزنـا سيـارة تودينـا فندقنـا الي حجزنـاه .. فندق منهاتن .. فندق راقي ورائع وجديد .. وسعره أيضـا رائع .. طبعا من مكتب حجزنـاه .. واحد يقـاله عرفـان .. عطانا رقمه واحد من الشباب بالدمام ما قصر ..
00162811990974( عرفـان .. ) يتكلم العربية بطلاااااااقه .. ماشاء الله عليه .. لكن الظاهر ان مكتب الكاها أرخص أسعار منه ..
اذا ما لقيت عرفـان عندك مكتب كاها .. أفضل مكتب يظبطك وأرخصهم ..
أخذنـا تكسي من مكتب سيلفر بيرد .. رائع جدا .. وسعره الي وصلنـا اياه للفندق 100700 سعر رائع .. طبعا السيـارة سدرك ..

وصلنـا للفندق

.. عطيناهم الحجز .. والتأمين على السكن .. ودخلنـا الغرفة ..

الغرفة بصراحه رائعه .. بس يعيبها صغر حجمها .. كون ان حنـا 3 أشخـاص .. طبعا أنتكبنا .. عطونا سرير مزدوج وسرير مفرد .. بس أحلى نومه على الأرض .. خخخخخخخخ .. جايين تعبانين ..

منظر رائع من مسبح الفندق .. ويظهر فيه العمـارة المتطورة في هذا البلد ..

أول ما وصلنـا نزلنـا الأغراض والعفش ..

وطلعنـا على مجمع أتريوم بلازا مجمع حلو .. وعبـارة عن 7 أدوار ..

طبعـا أول شيء رحنـا نصرف الفلوس الي معنـا .. ( نصـائح : لابد أن تكون الفلوس جديدة وغير مطويه لأنها تفرق في الصرف غير كذا صرفنـا بالريـال السعودي أفضل من الدولار .. لأن رمضـان جاي .. والعالم كلها جايه لمكه ) طبعا اذا كانت خردة .. يعني أبو 5 ريال وأبو عشرة ريال وأبو ريال .. أفضل من الدولار .. فقط الخردة

أفضل صراف في الدور الثالث في نفس المجمع لون المحل أزرق بعد محلات الذهب .. وطبعا المحل صغير .. لكنه أفضل شيء وهذا كلام ناس خبره في الصرف ..

طبعا يفرق معك الصرف في كل يوم يوم يرتفع ويوم ينزل .. فأنت وحظك .. لكن اصرف جزء جزء ..

بعدها رحنـا نشتري شرايح تلفون في القبو في نفس المجمع .. طبعا أفضل خط ما أخذناه حنا لأني نسيت وش اسمه .. لكن اسم أفضل شريحه هي
( بروكسل ) وبعدين ( سمباتي ) و ( ام ثري ) حنا أخذنا سمباتي وشحنـا بـ 100000 ربيه .. طبعا لأني نسيت اسم الشريحة في الفندق

وبعدين رحنـا تعشينـا في مطعم والله ما أدري وش اسمه .. بس مو زين .. لكنه فخم .. ويا بلاش .. أنصدمنا من الفاتورة الصراحه .. طلعت بـ 33 ريال تقريبـا ..

قلت والله أنه أرخص من الشاورمـا .. من جد المطعم فخم وديكور وشغل بس الأكل النوعيه هذي أنا ما أحبها .. بس تمشي الحـال .. تقدر تقول أكل أندنوسي

مرينـا البقـاله في القبوا وأخذنا لنـا بعض الحلويـات ومويه وببسي وحركات .. ومشينـا على الفندق ..

وبالنسبه للتكاسي يا جماعه .. الي اشوفه أحسن هو انك تقوله شغل العداد .. علشان ما تزعل أحد ولا يزعل منك أحد .. طبعا فتحتة العداد بـ 5000 ربيه .. رجعنـا الفندق .. وصليـنا المغرب والعشى .. وجلسة حبيه وسواليف وسعة صدر .. وخلدنـا إلى النوم .. النوم بدري كويس يا شبـاب ..

تلخيص النصـائح :

• في موسم قبل رمضـان خذ معك ريال ولا تآخذ دولار وحاول أن يكون الإصدار جديد لأنها تفرق في الصرف طبعا خردة ..
• خل الفلوس جديدة وغير مصفوطة لأنها تفرق بالصرف وخلك قبل الساعه 6 المسـاء عندهم علشان ما يسكر .. لأنه يسكر الساعه 6 المسـاء
• صورة من الجواز للتجول
• مع التكاسي أتفق معهم على العداد الا اذا كنت تبي تآخذه يوم كامل .. ويوم كامل ما أنصحك تآخذه الا وأنت طالع للجبل
• التعامل الحسن مع الجميع .. كي لا تتعرض لأي مشكلة .. المشاكل ببلاش هناك ..
• خط التلفون خذ بروكسل
• ثلاجة الفندق أسعارها دبل .. علشان كذا خذ لك من أطرف بقاله كل الي تبي
• التكاسي الي في المطار خذ أرقامهم كلها علشان اذا احتجتها وأنت طالع للجبل ولا شيء بتكون عليك أرخص
• فندق أتريوم الي جنب مجمع أتريوم بلازا أبعد عنه .. لأن فيه مشاكل وتجمعات عرب واجد .. وأنت جاي تغير جو .. يعني خلك بعيد حبك يزيد ..
• من أماكن الزيارة في جاكرتا : المجمعات المذكورة أسفل / عالم البحار ( مدينة أنتشل )

/ عالم الثلج / انتشل / موناس / مسجد الإستقلال /

هذي مجموعة فنادق ينصح بالسكن فيها اسعارها مابين 60$ الي 90$ دولار
1. Millennium Hotel (على شوفتي له انه فخم ) ارخص واحد 60 دولار
2. Park Lane Hotel
3. Crowne Plaza Hotel
4. Sari Pan Pacific Hotel (موقعة ممتاز)
5. Ciputra Hotel (الفندق هذا في وسط مجمع بس عيبه بعيد شوي)
6. Hotel Aryaduta (عيبه انه قديم شوي )
7. Mandarin Oriental Hotel (موقعه ممتاز)
8. منهاتنق جنب بارتلين 70 دولار .. جنب السوق هذا الي سكناه أول يوم
9. اريا دوتا كويس بس قديم ..

وهذي مجموعة ثانية بس انها اغلى ما بين 100$ الي 130$ دولار
1. JW Marriott Hotel (مقابل له مجمع اسمة امباسدور)
2. Shangri-La Hotel
3. Mulia Senayan Hotel (الفندق هذا فخم جداً جداً … وهوا فندق الخطوط السعودية )

اما بالنسبة للمجمعات
1. Taman Anggrek Mall
2. Plaza Senayan
3. SOGO
4. Atrium Plaza
5. Plasa Indonesia
6. Mangga Dua (واحد شعبي و الثاني اجهزة إلكترونية )

مكاتب سياحية
Haryono
Jl. Kebon Sirih Raya No.9 K Jakarta Pusat 10340
Phone: 3920808 – 3921111
Fax : 3141937–3140891

سفارة المملكه العربيه السعوديه
Jl. M.T. Haryono Kav. 27
Cawang Atas, Jakarta Timur 13630
Tel (62-21) 801-1533, 801-1536, 801-1537
Fax (62-21) 801-1527
وخلص اليوم الثـاني من السفر في الطريق وفي الترتيب للرحلة والنوم بدري كي تستعيد النشـاط ..

[ موقف ]

برج موناس

خريطة أندونيسيـا في البرج .. وشرح عنها بالأندنوسي .. ولا فهمنا شيء

مطل من اعلى البرج على ساحة أندونيسيا

مسجد الإستقلال .. ماشاء الله المسجد كبير جدا .. ومبني على مواصفات إسلامية ..

يعني طول العمارة على عدد آيات القرآن .. والأعمده تدل على أركان الإسلام .. لا أدري هل هي تدخل في البدع أم لا .. !!

من المطاعم العربية الناجحه .. أكله مقبول ..

لي أكثر من 3 سنوات مشتهي هالمطعم .. وحنا رايحين له .. نط علينا واحد من الشباب قال ابي مطعم أبو نواس .. قالها يستهبل .. بس قلت ميخالف .. تبي نروح .. قال ايه نروح ..

إنطلقنـا إلى الجبل ليلا .. ويفضل الذهاب نهارا كي ترى الطريق كما يذكره السائق أنه رائع ..
توجهنـا إلى بعض الفلل الموجودة .. لم يعجبنـا شيء .. استقرينـا على فندق الياسمين

الفطور على المسبح من أروع الاماكن هدوءا وراحة .. !!

.. من الفلل الجيدة .. كوتا بونقا .. اللوتس .. قرين أبل .. نوفس .. كلها جيدة .. لكنها بعيدة عن المناطق السيـاحية ..

أحد الفلل

تجولنـا في الجبل ..وكانت مرافقة لأحد الشباب تلك التي لا يستغنون عنها

الله يعين المدمنين عليها

في الطريق الى بعض المناطق تجد مزارع الشاهي تشكل أروع المناظر

بنهاية يوم مليء بالزيارات ..

من المناطق الرائعه جدا جدا .. تمان سفـاري .. وتحتاج إلى يوم كامل للتجول ..
التجول مع الفيله .. والذهاب إلى الشلال .. والعروض .. ومفاجآت كثيرة .. تستحق الذهاب ..

مشكلة الي الا يكتب عربي

طال الطريق وملنا الترحالُ … الطريق من جد بعيد للشلال .. مشي تقريبا نص ساعه ..

هاه يسوى العنوه .. !!

العجيب ان المطاعم كلها تبيع الرز .. حتى المطاعم العالمين ماكدونالدز وكنتاكي

واليوم الثاني قضيناه في البراشوت .. ومنطقة الشلالات .. منطقة رائعه فيها أكثر من شلال .. مع أكل الذره المشويه .. بزيادة ملح ..  .. فعلا منطقة تستحق التعب .. متعبة في الصعود لكن تستحق العَنوة ..

في طريقنا الى البراشوت .. صورة لمسجد مجاور لها ..

منصة الإقلاع ..

الإقلاع

أثناء الإقلاع

أثنـاء الهبوط

حتى ان حنا دخلنا حواري .. من الزحمه .. والله يعين ..

بيع الموز في وسط البحيرة .. كان لذيذا بحق ..!!

من أجمل الموز الذي ذقته في حياتي ..

ومن ثم رجعنـا إلى الجبل وتغدينـا في مطعم شاورما عربي .. وتقضينا المقاضي من البقالة السعودية

.. مستواه عادي جدا .. لكن أفضل من غيره .. من المطاعم العربية .. ومن ثم انطلقنـا إلى منطقة شلالات أعلى الجبل .. أسمها تشيبوداس .. منطقة رائعه .. وتستحق العنـاء .. عِندمـا تكون مُستلقيـا على تلك الصخرة الكبيرة .. وتستمتع بجو الرذاذ القادم من الشلال .. لا تستطيع وصف الجو الخيالي .. حقـا من أراد الإستجمام والاستكشاف لا تفوته ..

رجعنـا بعد أن أضلمت العين .. وجلسه حبيه أخويه في الفيلا .. ومسـاج مع شخص .. أقل ما تقول أنه طبي ..!!
فعلا ان قيل مساج فهذا هو .. ولا دلع مساج الفنادق وبـ 50000 ربيه .. يعني 20 ريال
وعشى في المطعم السعودي .. وأحلى سواليف الى الساعه 1 بالليل .. تأخرنا في النومه ذيك الليله ..

بعد ما خصلنـا من الجبل .. طلعنـا الى منطقة اسمها باندونق .. جلسنـا فيها يومين ..
اليوم الأول يوم الوصول .. رحنا ندور لنا سكن .. ولقينا فندق اسمه ايليفنتور .. حلو .. وفيه النت مجاني .. ماشاء الله الواير لس في الكفي تحت .. ويوصل للغرفة .. راح اليوم الأول تمشي في المنطقة .. من سوق وجلسه في الكفي .. ونت .. واليوم الثاني رحنـا للبركان .. وهذي الصور الي تشوفونها للبركان ..
طبعا نزلنـا تحت .. تقريبـا مشي ساعه .. انا أشهد ان حنا ضعفنا من كثر المشي .. وحطينا رجولنا في المويه الكبريتيه الحـارة .. يقولون انها علاج للروماتيزيوم .. وبعد ما خلصنا منها .. رحنا للبرك حقتهم يسمونها مويه بارد مويه حار .. طبعا بركه درجة حرارتها 40 درجة مئويه ويعرضون عليك مساج وتنظيف وما ادري ايش .. الزبده ان حنا دخلناها سريع سريع .. وخلصنـا من باندونق

طريقنـا للنزول الى الفوهه

درجة الحرارة للماء تفوق الـ 40 درجة مئويه

مويه حار مويه بارد .. المكان الي يسبحون فيه العالم .. من الشلال نفسه ممتد الى كليوات الأمتار

رجعنـا لجاكرتا الـ 3 أيـام الأخيرة .. قضينـا يوم في السيي وورد والآيس وورد .. عالم البحـار وعالم الثلج .. وخذنـا لنـا سفينه شراعية الله لا يوريك .. ومع الموج والزحمه .. جاء واحد يسحبنا بماطور .. قلت رجعونا بس .. اذا هذي أولها ينعاف تاليها .. وجلسنـا في مطعم بندر جاكرتـا .. مطل على البحر .. حق روقاااااان .. واليوم الأخير .. لترتيب الأغراض والذهاب الى المطـار بدري ..

الطريق كان ممطرا الأيـام الأخيرة ..

لعبة البلياردوا من أجمل الالعاب .. وفيها تجديد عن العادة .. وتعلم شيء جديد ..

عالم البحـار .. صورة من الأحواض

اكتشف ما هذه الصورة ..!!

طلعنـا بالقارب .. ورجعنا بسرعه .. لسوء الأجواء .. ولسوء القارب

مطعم بندر جاكرتـا .. رايق في الجلسه .. ومطل رائع

لولا الله ثم هي ولا راحت عيونـا من هالشمس .. الله يكفينا شر نار جهنم

ودعتنا الليالي الأندنوسيه بهذه المناظر .. على أمل اللقـاء بها بأعوام أخرى ..

كلنا منطلقين في الرجعه نحو الشمس .. فالغروب طول ذاك اليوم .. !!

نصـائح :
• لابد من تأكيد الحجز علشان ما تنتكب
• جاكرتـا ما أنصح فيها أبد .. لأنها زحممممممه .. ونجلس في التكسي من 3 الى 4 سـاعات علشان نوصل للمطعم 
ختاما .. أتمنى أني أفدت من يريد الذهاب إليها .. وإعطـاء فكرة عامه عنها ..

لا تنسونـا من الدعـاء ..